ന്യൂഡല്ഹി: കഴിഞ്ഞ ആറു മാസമായി രാജ്യത്ത് ഭക്ഷ്യധാന്യങ്ങളോ റേഷന് ആനൂകൂല്യങ്ങളോ വാങ്ങാത്ത 1.58 കോടി നിര്ജീവ റേഷന് കാര്ഡുകള് നാളെമുതൽ താത്കാലികമായി റദ്ദായേക്കും. പൊതുവിതരണ സംവിധാനത്തിലെ ഡാറ്റാബേസ് കൃത്യമാക്കുന്നതിന്റെയും ക്രമക്കേടുകളും വ്യാജ ഗുണഭോക്താക്കളെയും നിര്ജീവ ഗുണഭോക്താക്കളെയും ഒഴിവാക്കുന്നതിന്റെയും ഭാഗമായാണ് ഈ നീക്കമെന്നാണു കേന്ദ്രത്തിന്റെ വിശദീകരണം.
ഉടമകളുടെ പേരുകള് റേഷന് കാര്ഡ് ഡാറ്റാബേസില്നിന്ന് ഉടനടി പൂര്ണമായി നീക്കം ചെയ്യില്ല. താത്കാലികമായി റദ്ദ് ചെയ്യുന്ന നടപടി മാത്രമാണു സ്വീകരിക്കുക. റദ്ദ് ചെയ്ത റേഷന് കാര്ഡ് ഉടമകള്ക്ക്, തങ്ങള് യഥാര്ഥ ഗുണഭോക്താക്കളാണെന്നു തെളിയിക്കാനുള്ള ഇകെവൈസി പൂര്ത്തിയാക്കാന് മൂന്നു മാസത്തെ സമയം ലഭിക്കും. ഈ കാലയളവിനുള്ളില് ബന്ധപ്പെട്ട നടപടികള് പൂര്ത്തിയാക്കിയാല് റേഷന് കാര്ഡുകള് പുനഃസ്ഥാപിച്ചു നല്കും.
ഇത്തരം റേഷന് കാര്ഡുകള് താത്കാലികമായി റദ്ദ് ചെയ്യുമെന്നും അര്ഹരായവര്ക്ക് റദ്ദ് ചെയ്ത നടപടിയില് അന്തിമ തീരുമാനമെടുക്കുന്നതിനു മുമ്പായി മൂന്നു മാസത്തിനുള്ളില് ഫീല്ഡ് വെരിഫിക്കേഷനും ഇ കെവൈസി നടപടികളും പൂര്ത്തിയാക്കി കാര്ഡ് സജീവമാക്കാമെന്നും ഭേദഗതി വരുത്തിയ ടാര്ജറ്റഡ് പബ്ലിക് ഡിസ്ട്രിബ്യൂഷന് സിസ്റ്റം (കണ്ട്രോള്) ഓര്ഡറിലെ വ്യവസ്ഥയില് പറയുന്നു.
ആരുടെയൊക്കെ റേഷന് കാര്ഡുകള് റദ്ദാകും
മരിച്ചവര്, താമസം മാറിയവര്, വിദേശത്തു കുടിയേറിയവര്, ഇരട്ട കാര്ഡുടമകള് എന്നിങ്ങനെ അര്ഹതയില്ലാത്തവരെ ഒഴിവാക്കി അര്ഹരായവര്ക്കു മാത്രമാണ് ഭക്ഷ്യധാന്യങ്ങള് ലഭിക്കുന്നതെന്ന് ഉറപ്പാക്കാനുള്ള കേന്ദ്രനടപടിയുടെ ഭാഗമാണിത്.
എന്നാല് കുടിയേറ്റ തൊഴിലാളികള്, പ്രായമായവര്, സാങ്കേതിക പരിജ്ഞാനം കുറഞ്ഞവര് എന്നിവര്ക്ക് ഇ കെവൈസി പൂര്ത്തിയാക്കാന് സാധിക്കാതെ വന്നാലുള്ള ആശങ്കകള് പ്രതിപക്ഷ പാര്ട്ടികള് ഉയര്ത്തുന്നുണ്ട്.
ഡിജിറ്റൈസേഷന്, ആധാര് സീഡിംഗ്, ഇകെവൈസി എന്നിവയിലൂടെ ഇതുവരെ 5.8 കോടി റേഷന് കാര്ഡുകള് ഒഴിവാക്കിയിട്ടുണ്ടെന്ന് ഭക്ഷ്യമന്ത്രാലയം വ്യക്തമാക്കി. ജൂലൈ 30 വരെയുള്ള കണക്കനുസരിച്ച്, സ്മാര്ട്ട് പിഡിഎസ് പദ്ധതിവഴി നടപ്പാക്കുന്ന ഈ പ്രക്രിയയിലൂടെ 90.64 ശതമാനം ഇ കെവൈസി പൂര്ത്തീകരണം നടത്തിയിട്ടുണ്ട്.
Deepika
E-paper LOGIN
LOGIN